11:54 ص
الجمعة 15 يوليه 2022
كتبت- منى الموجي:
عبرت الفنانة لقاء الخميسي عن استيائها من توجيه بعض جماهير مباراة الاتحاد السكندري وسيراميكا كليوباترا التي أقيمت أمس الخميس 14 يوليو، عبارات تحمل سب وإهانات لحارس مرمى الاتحاد أحمد يحيى، والتي تسببت في إيذائه نفسيا وبكائه وإصراره على عدم استكمال المباراة.
وكتبت لقاء عبر حسابها الشخصي على موقع فيسبوك: “الحقيقة إن الواحد ساكت بقاله سنين بس اللي حصل النهاردة لا يسكت عليه، الأخلاق راحت فين؟! الإنسانية راحت فين؟ إيه بجد اللي حصل للناس، مشهد بائس ومخيف ولا يمت للإنسانية بصلة”.
وتابعت “أحمد يحيى حارس مرمى الاتحاد السكندري.. حارس مرمى مثابر ومجتهد وإنسان خلوق وشاب في بدايات مستقبله، اتوفى أخوه من يومين ونزل الملعب ولعب ووقف وصد وعمل اللي عليه كله والأخطاء ماتخصهوش وحتى لو تخصه ودا مش حاصل ! ليه الاهانات ليه الشتيمة ليه التعدي بألفاظ خارجة ليه كل دا.. يا عالم دي رياضة رياضة مش خناقة ما بين بلطجية، دي متعة مش تعنيف”.
وأضافت لقاء “إيه بقى امتى هاتفهم ان لاعب الكرة بني آدم بيؤدي شغله وبيحس وبيحلم وعنده أهل بيزعلوا أما بيتهان وهما يتهانوا معاه، وعنده أم بتزعل وزوجة بتتجرح على جرحه، كفاية بقى كفاية تكرهوا الناس في عيشتهم وشغلهم اللي بيبذلوا فيه مجهود وبيحبوه”.
واختتمت “ما حدش ليه حق مطلق في الشتيمة والإهانة.. أي حد بيشتم هل يقبل إنه يتشتم ويتهان، هل تقبل دا عليك وعلى أهل بيتك.. اتقوا الله بقى اتقوا الله”.
شهدت الدقيقة 79 من عمر مباراة الاتحاد السكندري وسيراميكا كليوباترا، مغادرة حارس مرمى الفريق الأول أحمد يحيى لملعب اللقاء باكيًا وسط هجوم من الجماهير.
النتيجة كانت تُشير لتقدم فريق سيراميكا كليوباترا بخماسية نظيفة وسط هجوم من قبل جماهير الاتحاد ليغادر بعد دقائق من الهدف الخامس أحمد يحيى الملعب ليحتضنه مدرب حراس سيراميكا كليوباترا أحمد ناجي.
