بعد رسالته لرونالدو.. محمد محمود يرد على محمود البزاوي: "عيب متضحكش علينا الناس"

10:33 م


الجمعة 26 أغسطس 2022

كتب- عبد الفتاح العجمي:

وجه الفنان محمد محمود، رسالة للفنان محمود البزاوي، بعدما وجه الأخير رسالة لنجم نادي مانشستر يونايتد الحالي، كريستيانو رونالدو، يطالبه فيها بالانضمام إلى نادي “المطاريد”.

وتحت عنوان “ماكنتش أتصور أبدا أن الفنان محمود البزاوي يعمل كده!!”؛ قال محمود، في مقطع فيديو نشره عبر “فيسبوك”: “تعليقا على رسالة صديقي وزميلي الفنان محمود البزاوي اللي بيطالب فيها النجم العالمي كريستيانو رونالدو أنه يجي مصر ويلعب في فريق اتحاد الدلتا في الأرياف، بقوله عيب، متضحكش علينا الناس يا أستاذ محمود”.

اقرأ أيضا| نادي المطاريد.. محمود البزاوي يوجه رسالة إلى كريستيانو رونالدو (فيديو)

أضاف: “كريستيانو رونالدو مش شوية عشان تقوله تعالى العب في فريق اتحاد الدلتا، لا يا محمود أنا مكنتش أفتكر إنها تطلع منك كده، إيه ده؟ هو الموضوع بالبساطة والتفاهة دي؟ كريستيانو رونالدو عشان يجي مصر لازم يبقى في استعدادات كتير يا أستاذ محمود، وقولولي أنا أعملهالكم، مش تقوله تعالى! العب في اتحاد الدلتا!”.

تابع: “أنت عادي طبيعي ولا في حاجة حصلت؟ أنا هقولك تتعمل إزاي يا محمود، الأول نجيب مدرب عالمي وعن طريقه نقدر نجيب كريستيانو رونالدو، مش كده يا محمود، مش للدرجادي يعني، أنا آسف طبعا إني بتعصب عليك دلوقتي، شكرا”.

وكان الفنان محمود البزاوي، وجه رسالة لنجم نادي مانشستر يونايتد الحالي، كريستيانو رونالدو، وذلك عبر حسابه بموقع “فيسبوك”، وقال في رسالته: “صديقي العزيز كريستيانو رونالدو، اسمحلك أقولك صديقي بدون تكليف، أحب أعرفك بنفسي، أنا محمود البزاوي، فنان مصري، والحقيقة اللي خلاني أبعتلك الفيديو ده هو اكتشافي لإنكار بعض الفرق العالمية والكبيرة ليك ولموهبتك ولفنك وعبقريتك في كرة القدم، خصوصا وإن معروف عنك إنك أحد أهم فناني كرة القدم في العالم وعلى مستوى التاريخ”.

وتابع: “عشان كده أنا قررت وفكرت أعرض عليك فرصة مهمة جدا، الفرصة دي فرصة العمر خد بالك، الفرصة دي إنك تيجي تزور مصر، وهتعجبك زي ما عجبتك المرة اللي فاتت، أنت مش هتزور مصر بس، أنت هتنضم لأحد الفرق من فرق اتحاد الدلتا، وهي فرقة المطاريد، ولو عايز تجيب حد من أسرتك معاك أو أصدقائك هتشرفونا طبعا، في بلدتنا الريفية الجميلة الهادئة دي”.

واستكمل: “وبعد معايشة شهر كده، أنا متأكد أنك هتختار تنضم لنا، تبقى معانا في فريق المطاريد، وأنا متأكد أنك هتاخد الموضوع ده بعين الاعتبار، وهتقرر في الآخر تبقى معانا، مرفق بالعرض كل التفاصيل، وعلى رأي المعلق فارس عوض، مستحيل مستحيل، لا تقلب الصفحة قبل أن تقرأ السطر الأخير، شكرًا، صديقك محمود البزاوي”.