04:00 ص
الإثنين 31 أكتوبر 2022
كتب- هاني صابر:
كشفت الفنانة وفاء سالم، عن تلقيها مكالمات دولية بعد حديثها عن العملية الجراحية التي تسببت في حدوث تشوهات بوجهها.
وقالت وفاء، بفيديو لها بثته عبر حسابها على”فيسبوك”: “شركات الإنتاج مش عايزاني، ومفيش عليا طلب، جايز ليهم مواصفات غيري، ولو مشتغلتش خالص كفاية جوجل بيسأل عليا، وجاتلي مكالمات دولية، وأنا مش من الناس اللي بتحب تعمل أي دوشة عشان تبقى تريند”.
وتابعت: “اللي يهمني إني أعمل أعمال ترتقي بالذوق العام، وحبيت التمثيل عشان نفسي أقدم رسالة، وأكون نموذج وقدوة كويسة للناس، نفسي أشتغل كوميدي، وحاسة إني ممكن أبقى لطيفة مش دمي تقيل فيه”.
وكانت وفاء سالم، كشفت مؤخرا تفاصيل خضوعها لعملية جراحية تسببت في تشوهات في وجهها من قبل أطباء معروفين في مجال التجميل.
وقالت وفاء خلال مداخلة هاتفية مع الإعلامي عمرو أديب في برنامجه “الحكاية”: “أنا على مدار كذا سنة تعرضت لحقن وخيوط عند دكاترة كبيرة مشاهير، وكنت كل مرة أروح لدكتور على أساس يصلحلي غلط اللي قبله”.
وأضافت: “كل مرة كنت بتفرج على النتيجة، ألاقي تشوهات في وشي، والناس كانت بتتكسف تقولي، حتى كان أدائي مضايقني جدا، إزاي كمملثة وأنا في تشوهات في وشي، لغاية إني وصلت لمرحلة، إني مش هروح لأي دكتور، لإني كل ما أروح لدكتور يقولي احنا مش هنقدر نعمل أي حاجة”.
وتابعت: “أنا دلوقتي بوري وشي لحضرتك من غير أي فلاتر ومن غير أي ميك أب، المناطق اللي في وشي أغلب الأساتذة قالولي مش هنقدر نتدخل لإنها مناطق أعصاب. لحد ما ربنا كرمني وقابلت دكتور س.غ، أنا ما كنتش فاهمة لما قابلته قالي احنا محتاجين نعمل إشاعة للمنطقة دي”.
وأكملت: “الدكتور عمل العملية وصورها لي فيديو، لقى إن الصديد واصل للشبكية وللمخ، الحمد لله ربنا انقذني، أنقذ حياتي، بعيدا عن إني همثل أو مش همثل، الحمد لله إنه أنا تجاوزت دا”.
وأردفت: “الصديد اللي حصلي كان من الحقن، وكان في خيوط جوا وشي، أنا تعرضت لطول الوقت لشكل من أشكال الابتزاز، وكان نفسي إن دا ما يحصلش”.
واستطردت: “أنا رجعت بنسبة كبيرة جدا لشكلي، رجعلي وفاء، أنا عايزة وفاء اللي الجمهور حبها”.
يذكر أن أخر أعمال الفنانة وفاء سالم مسلسل “القاتل الذي أحبني”، بطولة هاني رمزي، سهير رمزي، أحمد فؤاد سليم، محمد جمعة، ياسر فرج، رانيا منصور، تأليف صلاح عربي، إخراج عمرو عابدين.
