السبت 15/فبراير/2025 – 02:09 م
كشف محمد الدماطي عضو مجلس إدارة الأهلي مفاجأة بشأن إنشاء ستاد الأهلي، تزامنًا مع بدء عملية الحفر لإنشائه في مدينة الشيخ زايد بالسادس من أكتوبر.
الدماطي يكشف مفاجأة بشأن ستاد الأهلي
وكتب محمد الدماطي عبر حسابه الشخصي على فيسبوك: هقول على قصة عمري ما قولتها قبل كدة، أول مرة قعدت مع الكابتن على الانتخابات كان في يوليو 2017، وكانت اللائحة الاسترشادية نزلت وأعلن إنه هينزل الانتخابات.
وتابع: أنا اللي بادرت بالمكالمة وعملت بريزنتيشن كاملة عن نقدر نعمل إيه في النادي، وكيفية تنمية الموارد، عملت الكلام ده وأنا مجرد مشجع بيحلم إنه يكون موجود في قائمة محمود الخطيب.
وواصل الدماطي: المهم بعد ما خلصت قولتله أنا شايف عشان الناس تصدق كل الوعود الانتخابية دي، لازم نقول إن ستاد الأهلي هيبقي صعب في المرحلة الحالية ومنقدرش نوعد بحاجة عنه، كان ماشي معايا طول القعدة كويس ومبسوط لحد الحتة دي.
وأوضح: رد عليا بزعل، بس دة حلم الناس كلها وحلمي أنا شخصيًا، مقدرش أبدًا أحبط الناس وإن شاء الله هنعمله، وعلى مدار السنين اللي فاتت عمر ما الحلم ده غاب عنه وكان على طول مركز في تحقيقه، ودا بيعكس قد إيه الاستاد كان الهدف الأكبر.
واختتم محمد الدماطي: إن شاء الله بعد 4 سنين من النهاردة يبقى حاضر أول مباراة على الاستاد الجديد كرئيس للنادي الأهلي.
وكشف الأهلي عن تصميم الاستاد في حفل ضخم أمس الجمعة، وذلك في معبد حتشبسوت في مدينة الأقصر، ضمن الاحتفال بوصول درع كأس العالم للأندية إلى القلعة الحمراء.
