01:40 م
الأحد 05 يونيو 2022
كتب-وائل توفيق:
كشفت الفنانة شيرين سيف النصر، كواليس صورتها الأخيرة التي انتشرت عبر مواقع التواصل الاجتماعي، بالإضافة إلى أمنيتها في المشاركة في مسلسل “الاختيار”، وكواليس علاقتها بالفنان عادل إمام.
وقالت شيرين، في مداخلة هاتفية لبرنامج “مساء dmc” عبر قناة “dmc”: “واحدة صورتهالي من حوالي أسبوعين، كنت خايفة لما نزلت، مش عاملة ميكب ولا شعري، قولت الجمهور جايز متعجبوش الصورة، الحمد لله لقيت الصورة عجبتهم قوي، وقالولي كلام حلو جدا، الحمد لله يارب”.
وعن غيابها طوال السنوات الماضية، أضافت: “الصراحة والدتي توفت، فهو ده اللي بعدني، مقدرتش أكمل، يعني تعبت، تعبت قوي بعد ما ماما توفت فبعدت، ومقدرتش، كانت كل حاجة في حياتي الله يرحمها، كانت حياتي كلها، هي اللي كانت بتقف جنبي، والأفلام بتقرهالي، والمسلسلات وصحافة تكلمها، كانت هي شيلاني شيل، فتعبت قوي بعد ما توفت، ولقيت مع الوقت الورق اللي بيجيلي مش أقد كده كمان، فقولت خليني أحسن على الحاجات اللي عملتها، وفي أعمال تعرض حاليا عليا جميلة، في حاجات حلوة قوي، بدرسها دلوقتي، واحتمال أرجع كمان شهرين تلاتة، في السينما إن شاء الله”.
وواصلت: “بسأل عن الفنان عادل إمام بس مبنتكلمش، والفنان سمير صبري قبل ما يتوفى بحوالي أسبوع كلمته، كنت بسأل عليه وبطمن عليه، وبقوله يلا ارجعلنا بالسلامة، وكانت صحته حلوة جدا، وتفاجئت باللي حصل، أنا نفسي أعمل حاجة زي مين ميحبش فاطمة، كان نفسي أدخل الاختيار أعمل دور، ولو مشهد واحد بس، التلات أجزاء أحلى من بعض الحقيقة، وهم أبدعوا إن كان ياسر جلال ولا السقا وأحمد عز ولا كريم عبد العزيز كلهم أبدعوا، وأنا كنت بتمنى يعني أقول يارب لو يدوني مشهد كنت عملته، أهو ده كان يرجعني من الاعتزال، آه والله”.
شيرين سيف النصر واحدة من أشهر نجمات الفن في مصر والعالم العربي، قدمت عددًا كبيرًا من المسلسلات التي ما زال يحرص الجمهور على مشاهدتها في كل إعادة عبر القنوات الفضائية المختلفة، منها: “من الذي لا يحب فاطمة”، “المال والبنون”، “اللص الذي أحبه”، “غاضبون وغاضبات”، كما شاركت في بطولة أفلام “سواق الهانم”، “النوم في العسل”.
