فتح محمد أشرف روقا، لاعب الزمالك السابق، النار بقوة على كل من عبد الواحد السيد مدير الكرة السابق بالقلعة البيضاء، ومدرب الفريق الأبيض السابق أيمن عبد العزيز، موجّهًا رسائل حاسمة حملت لهجة حادة ودفاعًا صريحًا عن نفسه، وذلك بعد فتح ملف مستحقاته المتأخرى لدى النادي.
وكتب محمد أشرف روقا عبر حسابه الرسمي بموقع “إنستجرام”: “أنا أول مرة أكتب حاجة وأعلّق على موضوع أنا قولته، أو أرد على حد وأذكره باسمه، وهنا كلامي للكابتن عبد الواحد السيد”.
وتابع: “حضرتك عارف أنا بحبك إزاي وبحترمك إزاي، وده البند اللي في عقدي، واللي حضرتك قلت إنه مش موجود أو إن البند ملوش علاقة بالفسخ من طرف واحد، وحضرتك بتقول المفترض إني شخص متربي، لا هو ده مش مفترض، أنا الحمد لله متربي ومتربي كويس جدًا، ومش مستني حد يقول ده متربي ولا لا، وحضرتك عارف إني مليش في الكذب والتحوير”.
وأضاف: “أما الشخص التاني فهو كابتن أيمن عبد العزيز، حضرتك بتقول إن لما جيت نادي الزمالك جيت النادي من لا شيء، أنا مش مشكلتي إن حضرتك متعرفش حاجة، أنا قبل ما أجي نادي الزمالك الحمد لله أنا معدّي الـ100 ماتش”.
طالع أيضًا | خاص | عكس المتداول تمامًا.. الحقيقة الكاملة بشأن شكوى روقا ضد الزمالك أمام فيفا
وواصل: “ربنا كرمني ولعبت منتخب أولمبي مع كابتن حسام البدري، وربنا كرمني ورحت منتخب مصر مع كوبر، فأنا الحمد لله مروحتش نادي الزمالك من لا شيء، تاني حاجة أنا مبقدمش حجج زي ما بتقول، مليش أنا في الجو ده خالص، وإنت عارف أنا مين وابن مين، ومليش في الهجايص اللي بتتكلم فيها”.
وأردف: “وأنا مش مستني إني أشوف الناس بتهاجم حد علشان أطلع أتكلم، إنت بتقول إني خدت فلوس 6 سنين، مجتش من سنة؟ لا، هو حضرتك متعرفش حاجة برضه وبتتكلم بس، ومتعرفش إني كنت بقعد فترات بـ5 و6 أشهر ميدخلش بيتي جنيه”.
واختتم: “أما بالنسبة لحوار جوميز، فأنا مش محتاج أتحجج، ولا أَهري زي ما إنت طالع تتكلم في حاجات متعرفهاش، ربنا بس وحده اللي يعلم إذا كنت بكذب أو صادق، فإنت متطلعش تقول أي كلام فارغ عني وإنت متعرفش حاجة، وأه ركز في شغلك بدل ما إنت كل فرقة بتمسكها بتفشل وبعد كده تمشي”.