ردت الفنانة ليلى أحمد زاهر على حالة الجدل التي أثيرت عقب الهجوم والانتقادات التي تعرضت له بسبب ظهورها مع زوجها الفنان والمنتج هشام جمال في برنامج “ABtalks” مع الإعلامي أنس بوخش، موضحة أن بعض أجزاء الحلقة تم اقتطاعها وتداولها بمعانٍ مختلفة عن سياقها الكامل.
وقالت ليلى عبر حسابها على موقع “انستجرام”، إن تصوير الحلقة تم في أواخر أشهر الحمل، وقبل التصوير أبلغت إدارة أعمالها فريق البرنامج بأنها متعبة وتحتاج إلى التأجيل، إلا أنها حضرت في النهاية بعد تأخرها، واعتذرت لأنس بوخش وفريق البرنامج عن التأخير.
وأضافت: “بحترم وبقدر ردود الأفعال واهتمامكم، تصوير حلقة AB Talks حصل وأنا في أواخر شهور الحمل، قبل التصوير إدارة أعمالنا بلغت فريق البرنامج اننا هنوصل متأخر لاني تعبت شوية، ولما وصلنا اعتذرنا لأنس وفريق البرنامج بالكامل على التأخير.
وأضافت: “وإحنا داخلين الستوديو قلت لهشام إني لسه تعبانه وطلبت منه يساعد أكثر في إدارة الحوار لأني كنت تعبانه ولأن طاقتي بشكل عام أقل الفتره دي وده شيء طبيعي”.
ماذا حدث في موقف السفر بين ليلى وزوجها؟
وتابعت: “موقف السفر حصل فعلا ! لكن بعدها لوحده اتكلم معايا وقالي أنه انتبه أنه تصرف غلط بحكم طريقة نشأة شباب كتير وإنه نوع تصرفات محتاج تصحيح وعلاج وده كان تكملة كلامه الموجود في الحلقة الكاملة”.
وأكملت: “الحقيقة أن من يومها محصلش موقف مشابه، وفكرة أن راجل ياخد باله ويحلل ويصارح بالمشكله ويتغير عشانك هو اكيد شيء يحترم”.
وواصلت: “أنا اخترتك ! وأنا كمان اخترته.. لأن كثير من أسبابنا متشابهة، أكيد بحبه عشان طريقة تعامله معايا وكمان تعاملاته في حياته و مع الناس، وأكيد عشان شايفاه الاحسن والانسب والاحلى في كل حاجه، وسبب ذكر الجملة دي في الحلقه هو نقاش عن الغيره، وأنه كان بيأكدلي هو ليه عمره ما يشوف واحده احسن مني، مش لانه بيشرح بطريقة متعالية زي ما الجزء اللي نزل كان بيتكتب عليه”.
تفاصيل علاقة ليلى زاهر بـ هشام جمال
وعن علاقتها بهشام جمال، أوضحت: “علاقتي بهشام بدأت من ٤ سنين، وبقالنا حوالي سنة ونص متجوزين وأنا
أكثر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا احنا الاتنين، لكن كمان انا عندي أمي وجدتين واخوات وصديقات قريبين مني جدا ، كلهم سيدات بخبرات مختلفة شايفين علاقتنا من قريب وعايشين تفاصيل كتير منها ، وكلهم بيحترموه وبيحبوه وبيدعولنا نكمل بنفس التفاهم اللي إحنا فيه”.
وواصلت: “أنا بتكلم عن شخص من يوم فرحنا لحد النهارده كل ايامي معاه حلوه، بيعاملني بكل حب واحترام وتقدير، شخص من أول يوم في حملي مسابنيش في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحتويني بتغيرات مشاعري وأحاسيسي خلال تجربة جديدة علينا احنا الاثنين”.
وأكدت: أنا أقدر أحكم على اللي انا عايشاه حاليا.. وهو أننا عدينا أول مرحلة من الجواز بيتقال عليها من أصعب المراحل، بحب وتفاهم واتمنى نكمل كده واحسن ان شاء الله بعيدا عن التنبؤات المتشائمة المتأثرة بانتشار العلاقات السامة واللي هيلاقوا دائما زاويه تقلب او تحور اي شيء ايجابي ل سلبي حتى الكلام اللي انا بكتبه دلوقتي”.
رسالة ليلى أحمد زاهر لجمهورها
ووجهت ليلى رسالة لمتابعيها: “ربنا يكتب لكل حد السعادة والراحة في حياته بطريقته وإن شاء الله تشوفونا بعد سنين اكتر ، ونكون مبسوطين ومتفاهمين اكثر وأقدر أنا كمان أخليه سعيد قد ما هو بيخليني مبسوطة في حياتي”.
وطلبت: “أخيرا هطلب دعواتكم لينا واحنا بنعيش واحدة من أسعد مراحل حياتنا وبنستعد نستقبل أول مولودة لينا ان شاء الله”.
اقرأ أيضا..
وفاة زوجة الفنان حسن عيد بعد صراع مع المرض
“ملكة فرعونية”.. مي عز الدين تتألق بإطلالة أنيقة والجمهور يتغزل بجمالها
تووليت وإليانا وظاظا وزينة.. تعرف على أشهر دويتوهات نجوم الغناء في 2026