أول تعليق من محمد مكاوي بعد خطوبته على هند فاروق: "محدش خان حد"

علق البلوجر وصانع المحتوى محمد مكاوي على الجدل المثار حول خطوبته من الإعلامية هند فاروق، موضحا حقيقة علاقته بها وتوقيت انفصاله عن زوجته السابقة.

تعليق محمد مكاوي

وكتب محمد مكاوي عبر حسابه الخاص على موقع “إنستجرام”: “اتنين عملوا حلال ربنا وقروا فاتحة واتخطبوا وهيتجوزوا إن شاء الله. واتنين كانوا متجوزين بحلال ربنا وانفصلوا بالحلال من أكثر من سنتين. محدش خان حد، ومحدش اتظلم، ومفيش “ضحية” في القصة. زواجي السابق انتهى من أكثر من سنتين، وبعد انتهاء الزواج والانفصال بمدة طويلة، بدأت علاقة جديدة، والنهارده الحمد لله فيه خطوبة ونية للزواج إن شاء الله. وخطيبتي الحالية صاحبتي من 11 سنة، وما عرفتهاش عن طريق زوجتي السابقة. إحنا في الأساس كلنا زمايل في نفس مجال الشغل ومعارف من سنين، وده عمره ما كان معناه إن فيه علاقة أو حاجة مستخبية.

وتابع: “طبيعة شغلنا أصلًا فيها سفر وإيفنتات وتصوير وتعامل مع ناس كتير جدًا، فمش معنى إن اتنين سافروا في نفس الشغل، أو حضروا إيفنت مع بعض، أو اتصوروا سوا، إنهم أصحاب مقربين أو إن كان بينهم أي نوع من العلاقات. مفيش علاقات اتداخلت، ومحدش خان حد، ومحدش أخد مكان حد، ومش لازم كل قصة انتهت يبقى فيها ضحية وجاني، ومش لازم بداية جديدة تبقى على حساب حد تاني أو معناها إن فيه حاجة حصلت في الماضي”.

وأضاف: “في نقطة أهم، لما إنسانة تختار إنها تلتزم بأمر ربنا وتتحجب، إيه الهدف إننا نرجع نفتش في صورها القديمة قبل الحجاب وننشرها للناس؟ “إِنَّ الَّذِينَ يُحِبُّونَ أَن تَشِيعَ الْفَاحِشَةُ فِي الَّذِينَ آمَنُوا لَهُمْ عَذَابٌ أَلِيمٌ”. اللي اختار يقرب من ربنا ويتبع أمره، الأولى إننا نعينه ونستره ونحترم اختياره، مش نرجع نطلع له صور من وقت هو اختار إنه يتجاوزه.

واختتم: “كل واحد فينا عنده حياة وبيت وأهل ومشاعر، والكلمة والصورة اللي بتتنشر ممكن تأذي ناس ملهاش أي ذنب. فاتقوا ربنا في كلامكم، وفي أعراض الناس، وفي اللي بتنشره إيديكم. ومش كل قصة محتاجة ضحية، ومش كل سعادة جديدة لازم ندور وراها على حد نلومه. واللي بيحبنا وبيتمنالنا الخير، ادعولنا ربنا يتمملنا على خير، ويبارك لنا في اللي جاي، ويرزق كل واحد فيكم الخير والسعادة وراحة البال”.

خطوبة محمد مكاوي وهند فاروق

واحتفلت الإعلامية هند فاروق بخطوبتها على البلوجر وصانع المحتوى محمد مكاوي، وسط أجواء عائلية بحضور الأهل والأصدقاء.

وأقيم حفل الخطوبة في أجواء بسيطة، واقتصر الحضور على أفراد العائلتين وعدد من الأصدقاء المقربين.

انفصال محمد مكاوي عن زوجته السابقة

يُذكر أن محمد مكاوي انفصل عن زوجته السابقة نورهان عماد، بعد زواج دام نحو عامين ونصف، وأنجبا خلال فترة زواجهما ابنهما «علي».

اقرأ أيضًا:
وفاة الفنانة العالمية الشابة كارلا جيفري عن عمر ناهز 33 عامًا

احتفالية خاصة بمشروع المسرح المترجم في الجامعة الأمريكية بالتحرير

داخل المستشفى.. راندا البحيري تكشف عن تعرضها لوعكة صحية