تحدث الفنان عمرو يوسف عن علاقته بالفنان عمرو دياب، كاشفًا جانبًا من شخصيته بعيدًا عن صورته المعروفة كنجم غنائي، ومؤكدًا أن نجاحه واستمراره لسنوات طويلة لا يرتبطان فقط بقدرته على التطوير ومواكبة الأجيال.
وخلال لقائه في بودكاست “موعد مع لميس” الذي تقدمه الإعلامية لميس الحديدي، تحدث عمرو يوسف عن عمرو دياب، قائلًا: “عمرو دياب موضوع كبير طبعًا، عمرو دياب تاريخ”.
وأضاف: “عمرو دياب بالنسبة لي الميموريز بتاعة فترة الشباب كلها، أو أصغر من المراهقة للشباب لغاية النهارده، كل مرحلة ممكن تبقى مرتبطة بألبوم أو بأغنية، وده مش أنا بس”.
وكشف عمرو يوسف أن صداقته بعمرو دياب بدأت منذ أكثر من 10 سنوات، موضحًا: “أنا يمكن قربت لعمرو وبقى في بينا يعني صداقة من حوالي أكتر من 10 سنين، وطبعًا لما قربت منه اكتشفت الإنسان بقى، مش الفنان، الإنسان”.
وتابع: “الحقيقة هو مثقف جدًا، قاري في جميع المجالات، ويمكن إنتِ لما تقعدي معاه بشكل شخصي بتعرفي ده، أي حد بيقعد معاه بيلقط ده في ثانية؛ لأنه واضح”.
وأشار إلى أن عمرو دياب لا يستعرض ثقافته، قائلًا: “هو ما بيستعرضش بده، أو ما بيقولش ده، أو يعني مش حاجة هو بيطلع يقولها مثلًا في الإعلام أو كده، لكن هو مثقف جدًا، قاري جدًا، واعي جدًا للسوق اللي حواليه”.
عمرو يوسف: “عمرو دياب مؤسسة مش شخص”
وتحدث عمرو يوسف عن استمرار عمرو دياب في صدارة المشهد الغنائي عبر أجيال مختلفة، رافضًا اختزال نجاحه في قدرته على التطوير أو مواكبة الموضة.
وقال: “وأنا بشوفه برضه من المظلومين اللي دايمًا نتهمهم إن هما أذكياء جدًا وعندهم ذكاء فطري… لا، هو صوته حلو، بس. هو صوته حلو جدًا”.
وعندما قالت له لميس الحديدي إن عمرو دياب “بيقود الصناعة”، رد عمرو يوسف: “هو مؤسسة، هو مش شخص”.
وأضاف موضحًا: “إنتو ليه دايمًا بتنسوا إن صوته حلو؟ هو صوته حلو والله! صوته جميل جدًا وعذب جدًا”.
وعن إمكانية تعلمه من عمرو دياب فن الاستمرار، قال عمرو يوسف: “لا، هو ما حدش عارف ده، ما حدش يعرف يقلده ده”.
وعندما أوضحت له لميس أنها تقصد الاستمرار لسنوات طويلة، أجاب: “استمرار رقم واحد”.
واستشهد عمرو يوسف بقدرة عمرو دياب على الوصول إلى مختلف الأعمار، قائلًا: “أنا لسه الحفلة الآخرانية دي اللي كانت في الساحل، 70 و80 سنة بيتفرجوا عليه، و10 سنين بيتفرجوا عليه”.
واختتم حديثه عن عمرو دياب، قائلًا: “بنتي تمن سنين ما شفتهاش بتصرخ لما تشوف حد غير لما شافته”، مضيفًا: “هو طبعًا حالة استثنائية وعظيمة، وحاجة تشرف يعني، واجهة مشرفة جدًا جدًا جدًا لمصر”.