رد الفنان أحمد العوضي على موجة الانتقادات التي تعرض لها عقب تصريحاته خلال ظهوره في بودكاست “قصتي” مع الإعلامي محمد قيس، بعدما ربط بين قيادة السيارات ومراحل مختلفة من حياته، وهو ما أثار تفاعلًا واسعًا عبر مواقع التواصل الاجتماعي.
أحمد العوضي يرد على الانتقادات
وظهر أحمد العوضي في مقطع فيديو شاركه عبر حسابه الرسمي بموقع “فيسبوك”، وقال: “صباح الفل على كل إخواتي، شوفت إمبارح الناس اتكلمت وبتقول العوضي قال وعاد وعوضي شبه إيه بإيه والكلام ده عار تماما من الصحة، وأنا لما كتبت بوست اعتذار لما لاقيت الكلام ممكن يروح في حتة تانية ويمس أشخاص أنا بقدرهم وبحترمهم، نزلت الاعتذار عشان لو الكلام اتفهم غلط، لكن أنا أساسا مقلتش حاجة”.
وتابع: “وأنا لما عملت الحلقة ساعة و38 دقيقة، فأنا قلت كلام كتير، وحريص أنا بقول إيه، وإنت دخلت في نيتي وقولت أنا قاصد، والكلام مش حقيقي، الراجل كان بيسألني: الذكريات الجديدة ممكن تنسي الذكريات القديمة، فأنا قلت له صراحة ونصًا: كل مرحلة في الدنيا ليها ذكرياتها الخاصة، والمرحلة دي بتشمل سكن، بتشمل حد في حياتك، سيارة وشغل، وأنا وسعت المعنى وضربت مثال بالعربية واتكلمت بشكل تلقائي”.
وأضاف: “ولو أنا قاصد أو رايح لتلميح أو إني أقصد المعنى السيئ، مش هجيب سيرة عربية أبويا، أنا مش بالغباء ده، وقلت بعدها إن أنا بعد المرسيدس جبت مرسيدس، بس الكلام مجتزأ، وأنا مش بالسذاجة إني أشبه التشبيه الوضيع والدنيء ده، لإن عندي خالة وعمة وبنت خالة، لكن اللي عايز يتصيد هيتصيد، وإنت طلعتني عدو المرأة وبشتمها، صاحبي إنت مشوفتش الحلقة”.
أحمد العوضي: ” نيتي مكنش فيها غلط لحد”
واستكمل أحمد العوضي: “أنا قلت الست بتتعامل برنسيسة، ومقولتش أنا عايز ست ضعيفة، أنا قلت الراجل بيضعف أمام دموع المرأة وجمال المرأة، ضعفها في الحب، وقلت الراجل لو استقوى على الست في حالة الضعف يبقى راجل مش كويس، وقلت الست لازم تدلل في بيت أبوها، وقلت كلام كتير جدًا ميقولش إني بنظر للست نظرة دنيوية، لإن اللي ولدتني ست، فأكيد أنا مش هغلط في أمي الله يرحمها”.
واختتم: “وأنا اعتذرت عن الفهم الخطأ، لكن أنا نيتي مكنش فيها غلط لحد، سواء شخص بعينه أو النساء عمومًا، أنا متكلمتش في كلام يهين المرأة، وحتى قلت الناس بتخرج بذكريات حلوة، وقلت من 15 سنة أنا اتخانقت مع فلانة ليه، بس فاكر الذكريات الحلوة معاها، وده اللي قلته في الحديث، لم أتعرض لأي شخص أو ست عمومًا، اللي هي أختي وبنت خالتي وأمي، بأي كلمة مسيئة أو أي نية مسيئة”.
آخر مشاركات أحمد العوضي في الدراما التلفزيونية
كانت آخر مشاركات أحمد العوضي في الدراما التلفزيونية من خلال مسلسل “علي كلاي”، الذي عرض ضمن موسم دراما رمضان 2026.
وشارك في بطولة مسلسل “علي كلاي” كل من درة، وعصام السقا، ويارا السكري، ومحمود البزاوي، والعمل من تأليف محمود حمدان، وإخراج محمد عبد السلام.
اقرأ أيضا:
تشييع جثمان والد عمر السعيد بحضور نجوم الفن
ياسر جلال عن تعاونه مع رامز جلال: “هشتغل معاه قريب”