قبلت الفنانة شيماء سيف اعتذار الفنانة أيتن عامر بعدما كشفت شيماء خلال وجودها ضيفة ببرنامج “تحت ضغط”، أن الفنانة ايتن عامر هي من أحرجتها وتحدثت معها منذ سنوات عن أن زيادتها المفرطة في الوزن هي السبب في عدم إنجابها، وهو ما أثر على شيماء بالسلب طيلة سنوات.
شيماء سيف تقبل اعتذار أيتن عامر
أعادت شيماء سيف نشر فيديو اعتذار أيتن عامر عبر حسابها الرسمي على “فيسبوك” وكتبت: “حبيبتي يا أيتن اعتذارك مقبول وعلى راسى وانا اكيد عارفة انه نصيحتك كانت عن حسن نية، بس صدقينى مش كل المواضيع ينفع فيها النصح وخصوصا قدام زوجى الى كنا وقتها مش معرفين حد المشكلة فين، وده اللى اقصده ان البيوت اسرار مقفولة على أوجاعها وناسها بس هما ادرى بيها فخلينا دايما مدام احنا مش قريبين اوى ومجرد اصحاب وزمايل بينا عشرة حلوة نفضل سايبين الحدود دى ومنتعمقش اوى ونسأل او ننصح بحاجات اكيد ناسها ادرى بيها ولو كان بايديهم كانو حلوها لكن هى بتاعة ربنا”.
وتابعت: “وبمناسبة البيوت أنا عزلت من بدرى ومبقناش جيران عشان بس تعرفى اننا مكناش بنتكلم والسلام كان لربنا بس ولا يهمك هبعتلك اللوكيشن الجديد ياقمر وتنورى اى حته”.
كواليس اعتذار أيتن عامر
نشرت الفنانة أيتن عامر مقطع فيديو عبر صفحتها الرسمية على “فيسبوك”، أوضحت خلاله كواليس هذه التصريحات، وحقيقتها، وعن معاناتها الشخصية مع فكرة تأخر الإنجاب نظرا لشقيقتها التي توفت وهي تحاول الإنجاب.
وقالت أيتن عامر في الفيديو: “اعتذار واجب للزميلة العزيزة شيماء سيف، انا حابه اعتذر لك قدام الناس كلها، على الموقف اللي انت حكيتيه امبارح في البرنامج، والغرض الأساسي من الفيديو ده، أن أقولك حقك عليا قدام الناس كلها وان انا عايزة أرضيكي، لأنك تعزي عليا وزعلك كمان، والحاجة التانية اني عايزة افكرك بشوية تفاصيل”.
وتابعت: “قعدت افتكر مع نفسي ده حصل امتى وايه السياق اللي كنا بنتكلم فيه، اكتشفت ان احنا كنا بنتكلم في القصة دي من 5 6 سنين، حوالين الدايت وعمليات التكميم وايه المزايا وايه العيوب؟، وقلت لك ساعتها ان عندي واحدة صديقتي كان الدكتور قالها أن زيادة الوزن مأثرة عليها في موضوع الإنجاب، ولما عملت عملية التكميم ووزنها خس ربنا أكرمها والمشكلة دي اختفت”.
مضيفة: “ووقتها انا مكنتش اعرف ان انتي عندك مشكلة في موضوع الإنجاب، وده اللي يثبت حسن نيتي، وانا لا كان قصدي أحرجك، ولا أضايقك ولو كنتي روحتي رفعتي عليا سماعة التليفون او بعتي لي رسالة وقولتي لي انا زعلانة منك كنت هعتذر لك وهاحي ابوس راسك واقولك حقك عليا وكانت خلصت من 5 6 سنين، واللي مزعلني دلوقتي ليه من 5 6 سنين كنا بنتقابل وبتضحكي في وشي وتسلمي عليا عادي وانت من جواكي زعلانة مني، ليه؟”.
واستكملت: “يعز عليا زعلك، وزعلك يضايقني، لان انت عارفة انا بحبك قد ايه، وانا بحبك واللي بيحب بني آدم عمره ما يجرحه ولا يضايقه، ولو ده حصل كان واجب عليكي تعاتبيني عشان متفضليش زعلانة مني كل ده، وانا اختي اللي يرحمها كانت بتنام كل يوم معيطة من اللي كانت بتسمعه عن تأخر الإنجاب وهي مكانش في إيدها حاجة، اختي عاشت مع جوزها أكتر من 12 سنة وتوفت وهي بتحاول تجيب طفل عشان محدش يعايرها، ومستحيل الوجع اللي شوفته في أختي، أقبله على أي حد حتى لو معرفوش”.
اقرأ أيضا:
نجوم واجهوا تهمة الاعتداء الجنسي.. أحدهم اتهمته ابنته بالتحرش بها
“حتة مني” يقترب من انتهاء تصويره في رأس البر استعدادًا لعرضه قريبا
تامر حبيب يكشف تفاصيل الجزء الثاني من “سهر الليالي” (فيديو)