الإثنين 03/فبراير/2025 – 09:32 م
اشتكت معلمة تدعى جاسمين من إدارة مدرسة مالفيرن كولدج Malvern College Egypt، ومن سوء معاملتها للعاملين بداخلها.
معلمة بـ مالفيرن تشكو إدارة مدرستها: بتعامل الناس كإنهم جواري
وقالت جاسمين عبر صفحتها الرسمية على موقع التواصل الاجتماعي فيس بوك: أنا خريجة جامعة مصر الدولية اتهنت خلال عملي في مدرسة مالفيرن، ده تحذير لأي حد بيفكر يشتغل في المدرسة دي أو يدخل أولاده هناك، المكان ده يا جماعة تحت إدارة غير سوية وغير مؤهلة نفسيا، أستاذة (ل.ع) اللي ماسكة مكان أبوها (خ.ع) اللي فاكرين إنهم اشتروا البلد، كل كام يوم نسمع صويت هستيري من فوق عشان فيه موظف بيتهزأ، رعب للأطفال والكبار وأذى نفسي لا يحتمل.
وأضافت المعلمة: جايبين ناس متعلمين ولاد ناس يشتغلوا عندهم عشان يتهزأوا، كل يوم من بني آدمة 100٪ مش في كامل قواها العقلية، صاحبة المدرسة دي بتعامل الناس على إنهم جواري أو عبيد لمجرد إنهم بيشتغلوا عندها، الموظفين هناك كلهم جداد ليه؟ لإن فيه 100 واحد مشي من الإهانة والذل اللي بيتعرض له من الأستاذة.
شكوى المعلمة من إدارة المدرسة
واستكملت: في يومي الخامس في الشغل كلمت extension بتاعها بالغلط، واعتذرت أول ما سمعت الصوت، أتفاجئ برد فعل مش طبيعي أبدًا، سب وقذف وقلة ذوق وقلة أدب وإهانة، طبعا قلت هاخد حاجتي وأمشي استحالة أقعد ثانية في المكان ده، مضيفة: المديرة تبعتلي واحدة تقولي إنها عايزاني في مكتبها لحسن نيتي، فكراها هتعتذر وأتفاجئ برده بقلة أدب وإهانة وزعيق هستيري، كإني في مصحة نفسية.
وتابعت: هي طلعتني المكتب عشان تبقي اسمها طردتني، شايفين البني آدم لما يكون عنده نقص ومش مظبوط، امشي اطلعي برة يا بت ده بعض الألفاظ من واحدة المفروض إنها بتدير مدرسة محترمة ومشهورة، ده أسلوبها وطريقتها، بشهادة الجميع العاملين بالمدرسة ل.ع، بتهين الناس في الطالعة والنازلة، والعاملين بالمدرسة من أكبر واحد لأصغر واحد بيتعملوا بطريقة غير آدمية وأشبه للعبيد.
